ភ្នំពេញ: ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំនៅប្រទេសកម្ពុជា បានផ្តល់ជំនួយជិត ៨លានដុល្លារអាមេរិក ដើម្បីបង្កើតមជ្ឈមណ្ឌលជាតិបណ្តុះធុរកិច្ចថ្មីមួយនៅកម្ពុជា ស្ថិតនៅក្នុងបរិវេណសាកលវិទ្យាល័យភូមិន្ទភ្នំពេញ (RUPP) ។

ដំណឹងនេះបានបង្ហាញឡើងក្នុងសន្និសីទសារព័ត៌មាន ស្តីពីលទ្ធផលនៃការរៀបចំនូវកម្មវិធីតាមអនឡាញលើប្រធានបទ «គោលនយោបាយរបស់រដ្ឋាភិបាលសំរាប់ធុរកិច្ចថ្មីនៅកម្ពុជា» ដោយទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំនៅប្រទេស កម្ពុជា សាកលវិទ្យាល័យភូមិន្ទភ្នំពេញ (RUPP) និងមជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា (NICC) នៅរសៀលថ្ងៃទី២៧ ខែសីហា ឆ្នាំ២០២១នេះ។

លោក នោ ហ្យន់ជូន (Rho Hyun-Jun) ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចំានៅប្រទេស កម្ពុជា បានបញ្ជាក់ថាជំនួយជិត ៨លានដុល្លារនេះ គឺបូកទាំងចំណាយទៅលើការ សាងសង់អគារ បំពាក់សម្ភារបរិក្ខារ និងការបណ្តុះបណ្តាលបុគ្គលិកនៅក្នុង មជ្ឈមណ្ឌល។ លោកបន្តថាអគារមជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា នឹងត្រូវសាងសង់រួចនៅឆ្នាំ២០២៣។

អគារមជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា ត្រូវបានបង្កើតឡើងដោយស្ថិតក្នុង «គម្រោងបង្កើតប្រព័ន្ធជំរុញពាណិជ្ជកម្ម រវាងសាកលវិទ្យាល័យនិងឧស្សាហកម្មនៅកម្ពុជា» ដែលមានគោលដៅសម្រេចឲ្យបាននូវការធ្វើពិពិធកម្មឧស្សាហកម្ម តាមរយៈការបង្កើតប្រព័ន្ធអេកូ សម្រាប់ការចាប់ផ្តើមអាជីវកម្មនៅកម្ពុជា៕

តាមការបញ្ជាក់របស់លោកបណ្ឌិត ស្រ៊ុន សូវិឡា នាយកមជ្ឈមណ្ឌលជាតិបណ្តុះធុរកិច្ចថ្មីនៃកម្ពុជាបានឲ្យដឹងថា មជ្ឈមណ្ឌលជាតិបណ្តុះធុរកិច្ចថ្មីនៃកម្ពុជានេះមិនមែនសម្រាប់ តែនិស្សិតសាកលវិទ្យាល័យភូមិន្ទភ្នំពេញទេ គឺសម្រាប់មនុស្សគ្រប់គ្នាទូទៅតែម្តង៕